Макрон ја претстави новата доброволна воена служба, ќе биде отворена за лица од 18 и 19 години

Емануел Макрон ја претстави новата доброволна воена служба за млади, што ќе почне во средината на следната година, за да ѝ помогне на Франција да одговори на забрзаните закани на глобалната сцена.

„Франција не може да остане статична. Нашиот план е инспириран од практиките на нашите европски партнери, во време кога се соочуваме со закана што нè оптоварува сите“, изјави Макрон.

Тој појасни дека доброволната служба ќе биде отворена за 18 и 19-годишници, кои ќе бидат платени и ќе трае десет месеци. Таа ќе ја чини државата две милијарди евра, но Макрон ја опиша како значаен и неопходен напор.

Се очекува шемата да привлече 3.000 млади во 2026, со цел да порасне на 10.000 до 2030 година. Службата ќе се спроведува исклучиво во Франција.

„Мојата амбиција за Франција е да стигне до 50.000 доброволци до 2036 година, во зависност од развојот на заканите. По програмата, учесниците би можеле да се интегрираат во цивилниот живот, да станат резервисти или да останат во вооружените сили“, рече Макрон.

Задолжителната воена служба во Франција беше укината од претседателот Жак Ширак во 1996 и Макрон кажа дека регрутацијата нема смисла во денешните услови. Франција моментално има 47.000 резервисти и целта е оваа бројка да порасне на 100.000 до 2030.

Share on Facebook

Tweet

Follow us

Save