Маѓар: Унгарија сака мир, затоа ѝ се потребни силни вооружени сили

Унгарија во денешниот несигурен свет има потреба од силни вооружени сили – изјави премиерот Петер Маѓар. Според него, тоа не значи дека земјата сака војна, туку „точно спротивното – сакаме мир и сакаме да живееме во мир“.

На денешната церемонија за кревање на националното знаме и полагање воена заклетва пред зградата на парламентот, по повод националниот празник Ден на свети Стефан (Иштван), унгарскиот премиер истакна дека новите војници ја започнуваат службата во особено сложен период.

– Во Европа се води војна, светот е понепредвидлив отколку што бил со децении, се појавуваат нови вооружени системи, а карактерот на воените дејства се менува за месеци толку колку што порано се менуваше за децении – рече Маѓар.

Тој нагласи дека за зачувување на мирот се потребни ефикасна и компетентна дипломатија, сигурни сојузници, како и сопствен одбранбен капацитет.

– Унгарските вооружени сили мора да бидат армија на која можат да се потпрат и Унгарците и нашите сојузници – добро опремена, одлично подготвена, технолошки напредна и пред сè добро раководена. За да го постигнеме тоа, имаме потреба од вас – изјави премиерот пред војниците.

Share on Facebook

Tweet

Follow us

Save