Мерц: Подготвени сме за нови санкции доколку нема средба меѓу Путин и Зеленски

Западните земји се подготвени да го зголемат притисокот врз Русија со санкции доколку нема средба меѓу рускиот претседател Владимир Путин и Владимир Зеленски, изјави германскиот канцелар Фридрих Мерц. На заедничката прес-конференција со канадскиот премиер Марк Карни во Берлин, Мерц рече дека „сега е ред на Москва“.

„Доколку нема таков чекор од руска страна, ќе биде потребно да се зголеми притисокот“, нагласи тој.

„Во таков случај, ние во Европската Унија работиме на нови санкции. Претседателот на САД (Доналд Трамп) од своја страна не ги исклучи новите казнени тарифи“, додаде германскиот канцелар. Мерц, исто така, потсети дека Трамп „предложил трилатерални преговори – меѓу него, Путин и Зеленски“. „Тоа би бил логичниот следен чекор“, смета Мерц.

Воведувањето нови антируски санкции ќе ја погоди самата економија на Европа, предупреди пратеничката на Државната дума Светлана Журова.

„Европската економија веќе поминува низ тешки времиња поради антируските санкции, особено во одредени сектори. И, се разбира, тие самите не сакаат дополнително да ги влошат овие последици“, нагласи Журова. Покрај тоа, пратеничката истакна дека состанокот на толку високо ниво бара „многу сериозна подготовка“. Според неа, состанокот меѓу Путин и Зеленски ќе биде потежок за организирање во однос на безбедноста отколку разговорите со Трамп што се одржаа во Алјаска.

Share on Facebook

Tweet

Follow us

Save