Муцунски во одбрана на политиките на Трамп: Со издвојување на пет проценти од БДП за одбраната инвестираме во безбедноста на државата

Издвојувањето на 5 отсто од буџетот за одбрана претставува севкупна инвестиција во безбедноста, инфраструктурата и економскиот развој на државата, вели шефот на македонската дипломатија, Тимчо Муцунски. Тој нагласи дека сите членки на НАТО донеле одлука да издвојуваат до 5% од своите буџети за одбраната до 2035 година.

„Тоа беше одлука донесена со консензус во рамките на Алијансата. За нас се значајни овие одлуки. Одиме кон овие 5%, за да немаме потреба да издвојуваме 30-40% како што денеска мораат некои земји кои имаат конфликти на својата територија“ рече Муцунски.

Средствата ќе опфатат не само воена модернизација, туку и инвестиции во инфраструктурата, сајбер безбедноста, па дури и иновации и стартап компании.

„Сите набавки и мерки што ги презема Министерството за одбрана за модернизација на нашата армија ќе се вкалкулираат во тие 5 проценти“, рече Муцунски.

Трошоците ќе бидат проширени со аспекти кои досега не биле вклучени во дефиницијата на минималниот праг од 2 проценти. Како пример за тоа ги наведе инвестициите во нато-коридорите, инфраструктурата со стратешко и трговско значење, како и капацитетите за сајбер безбедност.

Share on Facebook

Tweet

Follow us

Save