Османи: САД никогаш нема да најдат полојален сојузник од Косово

Претседателката на Косово, Вјоса Османи, го прими Џеф Ховенијер, новиот американски амбасадор во Приштина, и порача дека САД никогаш нема да најдат попосветен и полојален сојузник од Косово.
„Во еден многу важен момент за двете наши земји, како индивидуално така и на билатерален план, задоволство е денеска во Приштина да ја пречекаме личноста како амбасадорот Ховенијер, кој е многу близок со Република Косово бидејќи претходно служел овде и ја разбира динамиката во нашата земја многу добро“, рече Османи, пренесува Косово онлајн.

Таа изјави дека Косово се променило во однос на она што го памети американскиот амбасадор, бидејќи, според неа, отишло напред.

„Но, една работа остана константна сето ова време. Тоа е нашиот однос, партнерство и пријателство со САД“, рече Османи.
Хавениер беше дел од персоналот на специјалниот пратеник на ОН за Косово. На сослушувањето пред Комитетот за надворешни работи на Сенатот во октомври минатата година, тој рече дека доколку биде потврден како амбасадор, ќе и даде приоритет на континуираната поддршка на САД и ќе ја охрабри Приштина да биде конструктивна и флексибилна во разговорите за нормализирање на односите со Србија.

Share on Facebook

Tweet

Follow us

Save