Путин по смртта на Кисинџер: „Исклучителен дипломат, мудар и далековид државник“

Рускиот претседател Владимир Путин изрази длабоко сочувство за смртта на поранешниот американски дипломат Хенри Кисинџер. Во телеграма до вдовицата на Кисинџер, Ненси, Путин рече дека тој бил мудар и далековид државник, објави Кремљ.

„Почина извонреден дипломат, мудар и далековид државник, кој со децении уживаше заслужен авторитет ширум светот“, наведе Путин.

Тој потсети дека името на Кисинџер се поврзува со прагматична политика која овозможи да се постигнат детант и важни договори со САД, пренесува РИА Новости.

Кисинџер, контроверзниот добитник на Нобеловата награда и моќен дипломат чија служба под двајца претседатели остави неизбришлива трага во американската надворешна политика, почина на 100-годишна возраст.

Како државен секретар во 1970-тите во администрацијата на Ричард Никсон, тој учествуваше во клучните глобални настани од таа деценија.

Неговите напори доведоа до дипломатско отворање на Кина, историски американско-советски разговори за контрола на оружјето, проширување на врските меѓу Израел и неговите арапски соседи и Парискиот мировен договор со Северен Виетнам.

Share on Facebook

Tweet

Follow us

Save