Работник загина откако го удрил авион на аеродром во Канада

Работник на аеродромот „Монтреал Трудо“ во Канада загина откако бил удрен од авион за време на подготовките за неговото полетување, објави „Њујорк тајмс“.

Несреќата се случила на 24 август околу 19:30 часот по локално време. Работникот, вработен во компанијата „Самсик“, која обезбедува услуги на земја на аеродромот, бил удрен од авион „Ербас А350“ на авиокомпанијата „Френч би“.

Според првичните информации, авионот се движел наназад на пистата додека се подготвувал за лет кон Париз. Работникот бил тешко повреден и итно пренесен во болница, но подоцна им подлегнал на повредите.

Аеродромските власти потврдија дека станува збор за член на заедницата на аеродромот и изразија сочувство до семејството, пријателите и колегите на загинатиот.

Според канадските медиуми, работникот бил дел од тимот задолжен за операции на пистата. Сè уште се истражува како точно дошло до несреќата и какви биле движењата на авионот и работникот во моментот на ударот.

Во несреќата немало повредени патници или членови на екипажот. Авиокомпанијата „Френч би“ соопшти дека соработува со канадските власти во истрагата.

По трагедијата, аеродромската управа најави и поддршка за вработените и патниците кои биле сведоци на несреќата. За денеска е најавена и минута молчење во чест на загинатиот работник.

Истрагата треба да утврди како дошло до контактот меѓу авионот и работникот и дали биле почитувани сите безбедносни процедури при движењето на леталото на земја.

Share on Facebook

Tweet

Follow us

Save