Речиси 20.000 луѓе загинаа во земјотресите во Турција и Сирија: Бројките не престануваат да растат

Речиси 20.000 луѓе загинаа во разорниот земјотрес што во понеделникот ги погоди јужните делови на Турција и Сирија. Потрагата по преживеани продолжува. Беа испратени спасувачи од 65 земји. Првиот конвој со хуманитарна помош влезе во Сирија.

Високиот функционер на ОН Мартин Грифит ќе ги посети Газиантеп во Турција и Алепо и Дамаск во Сирија овој викенд за да ги процени потребите на луѓето таму и да види како Обединетите нации можат најдобро да помогнат, изјави генералниот секретар на ОН Антонио Гутереш.

Тој посочи дека е неопходно да се испрати поголема помош на северозападот на Сирија, кој е под контрола на опозицијата.

„Патиштата се оштетени, луѓето умираат. Сега е време да се истражат сите можности за собирање помош и испраќање персонал во областите погодени од земјотресот. Мораме да ги ставиме луѓето на прво место“, им рече Гутереш на новинарите во Њујорк.

Гутереш, исто така, повика на поголема хуманитарна помош од Турција да стигне до северозападна Сирија, велејќи дека би бил многу среќен доколку ОН користат повеќе од еден граничен премин за испорака на помош по разорниот земјотрес што го погоди регионот оваа недела.

Share on Facebook

Tweet

Follow us

Save