Русија ќе обезбеди поддршка за Северна Кореја по големите поплави

Рускиот претседател Владимир Путин денеска му порача на севернокорејскиот лидер Ким Џонг Ун дека ќе го поддржи по поплавите што ја погодија Северна Кореја во јули, соопшти Кремљ.

Ја споделуваме болката и тагата на пријателскиот народ на Демократска Народна Република Кореја. Секогаш можете да сметате на нашата помош и нашата поддршка , наведе Путин во пораката со сочувство до Ким Џонг Ун.

Северна Кореја минатиот месец регистрираше рекордни врнежи од дожд, кога на југозападниот дел од земјата, во градот Каесонг, наврнаа 463 милиметри дожд на метар квадратен за само еден ден. Јужнокорејскиот метеолошки центар наведе дека тоа е највисокото ниво на врнежи забележано во земјата во последните 29 години.

Москва и Пјонгјанг се сојузници од крајот на Корејската војна (1950-1953), но уште повеќе се зближија од почетокот на руската воена операција во Украина во февруари 2022 година. На крајот на јуни Путин во Пјонгјанг беше пречекан со голема помпа од Ким Џонг Ун, а самитот заврши со потпишување договор за меѓусебна одбрана.

Share on Facebook

Tweet

Follow us

Save