Рускиот блогер Стрелков од притвор ќе му биде противкандидат на Путин на претседателските избори?

Игор Гиркин, провоениот руски блогер што се претставува под псевдонимот Стрелков, најави дека би му се спротивставил на претседателот Владимир Путин на изборите во март в година.

Стрелков, кој на својот блог жестоко ја критикува воената стратегија на руските сили во Украина, одигра улога при анектирањето на Крим во 2014 година, но сега е обвинет за екстремизам и во притвор го чека судењето.

– Разбирам префектно дека при актуелната ситуација во Русија учеството на претседателски избори е како да седиш на крајот на масата и да си играш со хартиени авиончиња. Но обидот да ги обединам патриотските сили може да ги попречи плановите на Кремљ за изборите, на кои победникот веќе е познат – напишал Гиркин во писмо до своите симпатизери.

Тој побарал од нив да направат база за неговата кампања и уште сега да почнат да собираат потписи за кандидатурата.

Поранешниот разузнавачки полковник во Федералната служба за безбедност беше меѓу осудените во отсуство пред суд во Холандија во врска со соборувањето на патничкиот авион на „Малезија ерлајнс“ во Украина. Загинаа сите 298 патници и членови на екипажот.

По јавните критики на стратегијата во Украина, тој беше притворен во јули годинава поради екстремизам, за дела за кои може да добие и пет години затвор. Тој, теоретски, сепак може да учествува на изборите ако не биде осуден.

Share on Facebook

Tweet

Follow us

Save