Столтенберг: Забележани сериозни инциденти на Западен Балкан

Генералниот секретар на НАТО, Јенс Столтенберг, денеска изјави дека во претходниот период во регионот на Западен Балкан се забележани сериозни инциденти, зголемени тензии, запалива реторика и дека НАТО мора да остане фокусиран на тој регион, пренесуваат медиумите во регионот.

„Само што се вратив од посетата на регионот и она што го гледаме таму е дека тензиите растат. Видовме зголемени тензии и запалива реторика во Босна и Херцеговина. Ние, всушност, видовме сериозни инциденти на насилство на Косово, вклучително и напад врз мировниците на НАТО“, рече Столтенберг при влегувањето во седиштето на НАТО пред почетокот на првиот состанок на министрите за надворешни работи на алијансата.

Столтенберг додаде дека за време на инцидентите биле ранети 93 војници на НАТО, од кои некои многу сериозно, пренесува „Танјуг“.

„Значи, ова се сериозни инциденти и ние треба да останеме фокусирани на Западен Балкан во исто време кога, се разбира, се справуваме со војната во Газа и исто така продолжуваме да ја поддржуваме Украина. Бидете уверени, НАТО ќе направи сè што е потребно за да обезбеди стабилност во регионот бидејќи тоа е важно не само за Западен Балкан туку и за цела Европа и НАТО“, рече генералниот секретар на НАТО.

Share on Facebook

Tweet

Follow us

Save