Судот во Лондон одлучи во корист на Асанж!

Високиот суд во Лондон одлучи дека основачот на Викиликс, Џулијан Асанж може да поднесе жалба против екстрадицијата во САД.

На дводневното рочиште, неговите адвокати тврдеа дека обвиненијата, кои се однесуваат на објавувањето на илјадници доверливи и дипломатски документи поврзани со војните во Авганистан и Ирак, се политички мотивирани и дека барањето за екстрадиција е незаконско.
Судиите на Високиот суд во Лондон во соопштението наведоа дека адвокатите покажале дека Асанж има спорен случај и дека треба да му се даде можност да го претстави на целосна жалбена расправа закажана за мај.

САД бараат екстрадиција на Асанж поради објавувањето на тајните воени досиеја во 2010 и 2011 година, а Врховниот суд на ОК одлучи дека Асанж треба да биде екстрадиран, отфрлајќи ги тврдењата дека тој би можел да изврши самоубиство во американски затвор поради лошо ментално здравје.
Асанж во САД е обвинет за 17 точки за шпионажа, а доколку биде прогласен за виновен, според неговите адвокати, може да се соочи со казна затвор до 175 години.
Американските обвинители, сепак, тврдат дека казната нема да надмине 63 месеци.
Во 2010 година, порталот на Асанж „Викиликс“ објави видео од американската армија, на кое се гледаат десетици луѓе убиени во напад на хеликоптери Апачи во Багдад во 2007 година, меѓу кои и двајца новинари на Ројтерс.
Оттогаш, Викиликс објави илјадници тајни доверливи документи и дипломатски извештаи во кои се критикуваат американските светски лидери, од рускиот претседател Владимир Путин до членовите на саудиското кралско семејство.

Share on Facebook

Tweet

Follow us

Save