Торнадо пустошеше низ Сицилија: Автомобили летале од патот, оштетено училиште со 273 деца

Силно торнадо денеска го погоди западниот дел на Сицилија, оставајќи зад себе оштетени куќи, превртени автомобили и најмалку 11 повредени во реонот на Марсала и Петрозино.

Невремето започнало како двоен воден вител над морето во близина на пристаништето во Марсала, по што стигнало до копното и се претворило во силно торнадо. Погодени биле Марсала, Петрозино и делови од Мазара дел Вало.

Еден од најсериозните инциденти се случил во Петрозино, каде торнадото погодило автомобил и го исфрлило во провалија. Двете лица во возилото биле извлечени и пренесени во болница.

Сериозно е оштетено и училиштето „Алчиде Де Гаспери“ во Марсала, во кое во моментот на невремето имало повеќе од 270 ученици. Дел од прозорците биле искршени, оштетен бил покривот и внатрешноста на објектот, а неколку деца се здобиле со полесни повреди.

Силниот ветер превртувал автомобили, корнел дрвја и електрични столбови и предизвикал голема материјална штета на куќи и други објекти. Пожарникарски и спасувачки екипи од повеќе делови на Сицилија се ангажирани на терен.

Шефот на sicилијанската Цивилна заштита, Салваторе Кочина, го опиша торнадото како невообичаено силно за регионот.

„Беше речиси како американско торнадо. Никој не памети нешто со толкави размери“, изјави Кочина.

Тој посочи дека уште во септември било предупредено на можноста од екстремни временски појави по исклучително жешкото лето и големото количество топлина акумулирано во морето.

Претседателот на регионот Сицилија, Ренато Шифани, најави итни финансиски средства за погодените области, додека временските предупредувања за дожд и невреме на островот остануваат во сила.

Share on Facebook

Tweet

Follow us

Save