„Трамп не го опцу Нетанјаху, но имаа напнат разговор“, пренесува израелскиот Канал 12

Израелскиот премиер Бенјамин Нетанјаху имал „напнат“ разговор со американскиот претседател Доналд Трамп во врска со планираниот израелски напад врз цели на либанската милитантна група Хезболах во Бејрут, изјави денеска неименуван член на кабинетот на Нетанјаху.

Тој за израелскиот Канал 12 го демантираше претходниот извештај на мрежата дека Трамп го опцул Нетанјаху и лично го напаѓал за време на синоќешниот разговор, пренесува Тајмс оф Израел.

Во извештајот на Канал 12 се наведува дека синоќа биле одржани два разговори меѓу Нетанјаху и Трамп, еден во 19 часот по локално време и друг околу полноќ, при што вториот бил значително понапнат.

По првиот телефонски разговор, Трамп објави на социјалната мрежа Трут Соушл дека ИДФ нема да го нападне Бејрут и дека Израел и Хезболах нема да се напаѓаат меѓусебно. Нетанјаху подоцна сепак предупреди дека ќе ги спроведе своите претходно направени планови за напад врз Бејрут доколку Хезболах не ги запре нападите врз северот на Израел и потврди дека израелската офанзива во јужен Либан ќе продолжи.

Вториот телефонски разговор бил насочен кон меѓусебните поплаки на двајцата лидери во врска со нивните различни толкувања на првиот повик, наведува Канал 12. Трамп бил вознемирен што Нетанјаху најавил дека, освен одложувањето на нападот врз Бејрут, војната продолжува со полн интензитет, додека Нетанјаху бил фрустриран што објавата на Трамп сугерирала дека Израел ги прекинал воените операции на сите фронтови.

Меѓутоа, израелскиот извор демантира дека Трамп опцул и лично го нападнал Нетанјаху тврдејќи дека го штити од одење во затвор, како и дека рекол дека и израелскиот премиер и Израел се омразени ширум светот.

„Трамп за време на разговорот рече дека е тешко да се претстави позицијата на Израел пред светот и дека тоа поттикнува непријателство кон него. Разговорот заврши со договор дека Израел ќе се откаже од нападот врз Бејрут под услов да не биде нападнат на своја територија“, изјавил неименуваниот израелски извор.

Share on Facebook

Tweet

Follow us

Save