Филипче: Македонскиот јазик е безбеден, идентитетот е безбеден благодарение на СДСМ, но македонската интеграција во Унијата е сè подалечна

„Она што е прво и најважно да се каже е дека извештајот не е извештај за постоењето на македонската нација, македонскиот јазик или македонскиот идентитет. Македонскиот јазик и идентитет се јасно дефинирани и заштитени. Никој не може да ги допре или да им наштети. На македонски се преведува во ЕУ, на македонски се потпишуваат договорите меѓу ЕУ и Северна Македонија, на македонски се говори во Унијата. Ова го гарантира Преговарачката рамка,“ рече Филипче.

Со ова, тој порача дека европските институции веќе ја признаваат македонската реалност и дека ваквите прашања не се предмет на преговарање, туку се веќе решени и обезбедени.

„Во својот мандат, СДСМ успешно ги отфрлаше обидите македонскиот јазик да биде исклучен од извештајот затоа што имавме пријатели и стратешки партнери кои гледаа дека искрено се бориме за ЕУ-интеграција,“ истакна Филипче.

Тој додаде дека ова не е само нивна заслуга туку и резултат на искрената борба за европска иднина која е разбрана и поддржана од партнерите.

„Ние знаеме кои сме, на кој јазик говориме и токму тоа го загарантиравме со договорите,“ подвлече Филипче.

Во продолжение, Филипче објасни дека македонскиот народ има јасна визија и силна волја да се интегрира во ЕУ, но без отстапки од своето национално достоинство и идентитет.

„Нашата борба и визија беа јасни: да го заштитиме јазикот и идентитетот и што поскоро да влеземе во ЕУ како Македонци кои говорат македонски јазик. Ова во ниеден момент не беше, ниту пак е, загрозено сега,“ рече Филипче.

Тој нагласи дека македонскиот јазик и идентитет се сигурни и непроменливи, но дека неодговорните политики на актуелната власт ја оддалечуваат државата од ЕУ.

„Македонскиот јазик е безбеден, идентитетот е безбеден. Но македонската интеграција во Унијата е сè подалечна поради политиките и изборите на власта,“ истакна Филипче.

Share on Facebook

Tweet

Follow us

Save