Хаосот во Ирак продолжува: 14 лица загинаа, повеќе од 300 се повредени – Интервенира армијата

Четиринаесет лица загинаа, а повеќе од 300 се повредени во судирите меѓу приврзаниците на популарниот шиитски лидер Муктада ал Садр и вооружените групи на неговите политички ривали во Багдад и во неколку други провинции, јавува Ал Арабија, повикувајќи се на медицински извори.
Според каналот, во моментов во Багдад и Басра се водат жестоки битки меѓу бригадата Сараја ал-Салам (Мировни сили) која е подредена на Ал Садр и формациите на шиитската милиција Ал Хашд ал Шааби. Страните користат минофрлачи и тешки митралези.

Единиците на ирачката армија влегоа во Багдад како засилување на безбедносните сили. Според ТВ, двајца војници на ирачката армија загинале во судирите во „зелената зона“ на Багдад.
„Бројот на загинатите во судирите во Ирак се искачи на четиринаесет. Повеќе од 300 се повредени“, пишува телевизискиот канал.
Претходно, Муктада ал Садр најави прекин на неговите политички активности и на сите канцеларии на неговата партија во знак на протест против неподготвеноста на владата на земјата да одржи предвремени парламентарни избори во отсуство на можност за создавање широка коалиција на шиитските сили во парламентот.

Стотици приврзаници на Ал Садр упаднаа во „зелената зона“ на Багдад по неговата најава за неговото повлекување од политиката. Демонстрантите упаднаа и во Републиканската палата, седиштето на ирачката влада, лоцирана во Зелената зона, каде што дојде до судири меѓу нив и силите на редот.
Ирачките безбедносни сили подоцна ја презедоа целосната контрола врз Републиканската палата во Багдад, која во понеделникот беше заземена од приврзаниците на Ал Садр. Соопштено е дека безбедносните сили употребиле огнено оружје и солзавец.
Ирачкиот премиер Мустафа ал Казими апелираше до Муктада ал Садр со барање да ги повика своите поддржувачи да ги напуштат владините згради што ги зазедоа.
Муктада ал Садр во понеделникот вечерта го најави почетокот на штрајкот со глад, истакнувајќи дека има намера да го продолжи до крајот на насилството во Ирак.

Share on Facebook

Tweet

Follow us

Save