Швајцарскиот парламент одби да се приклучи на групата за санкции против Русија

Долниот дом на швајцарскиот парламент денеска го отфрли предлогот на Партијата на зелените, со кој Швајцарија ќе и се придружи на меѓународната РЕПО група за воведување економски санкции против Русија.
Со 101 глас „за“ и 80 „против“, Долниот дом го отфрли приклучувањето кон групата формирана во 2022 година од САД, Австралија, Канада, Франција, Германија, Италија, Јапонија, ОК и Европската комисија.

Владата претходно препорача да не се приклучува на групата РЕПО, а министерката за економија Бет Јанс рече дека предноста од таквата одлука се рефлектира во способноста на Швајцарија да организира мировен самит за војната во Украина.
Русија веќе ја отфрли можноста за учество на самитот, велејќи дека Швајцарија ја отфрлила својата декларирана неутралност со учеството во санкциите на ЕУ против Москва.

На 15 и 16 јуни, Швајцарија ќе биде домаќин на дводневна мировна конференција на високо ниво, чија цел е постигнување мир во Украина, врз основа на планот на украинскиот претседател Володимир Зеленски и швајцарскиот министер за надворешни работи Игнатиус Касис.

Share on Facebook

Tweet

Follow us

Save