INFOMAX.MK

Екипата на Еурофарм Пелистер со очекуван пораз ги започна своите настапи во Лигата на шампионите. Норвешкиот шампион Колштад славеше рутинска победа во Битола (22-31) и ги впиша првите бодови во групата А од европската ракометна елита.

Македонскиот стратег на клупата на пелистерци, Александар Јовиќ не го криеше незадоволството од убедливиот пораз.

„Честитки за победата на противникот, му посакувам среќа и успех во понатамошните натпревари во ЛШ. Лошо го отворивме натпреварот, имавме голема желба и бевме борбени, но не реализиравме многу зицери. По мојата статистика промашивме девет зицери, а имавме и 3-4 технички грешки. Затоа сметам дека не заслуживме пораз од девет разлика. Овој натпревар треба да биде поука за понатаму и големо искуство. Екипата е речиси нова, и затоа ни треба време. Ова не се алиби за поразот, туку тоа е реалност“, рече Јовиќ.

Пелистер во второто коло во Лигата на шампионите гостува кај Алборг, а претходно на 17 овој месец го игра големото дерби во домашниот шампионат против Вардар.