Случајот на 11-годишната Теа ги разбуди надлежните, идната недела стартува со терапија

Сторијата за Теа Јованова ги размрда здравствените власти, но и предизвика одромен револт кај јавноста – како може дете со месеци да биде оставено без терапија. Наместо биолошкиот кој е заглавен во тендерската процедура, алтернативниот лек што вчера го најавија од Детска клниика е стигнат и ќе почне да го прима од наредната недела. Тоа го потврди и министерот за здравство, но кажа и каква е реалноста во нашата земјата и зошто треба да дојде до детски плач.

-Лек не може да се набави ние кога сакаме и во временски рок што го посакуваме. Тоа е процес на увоз на специфичен лек и одзема време за жал, и еве сега е обезбеден, вели Беким Сали, министер за здравство.

Освен Теа, според информации на Сител и други деца со истата дијагноза јувенилен ревматоиден артритис чекаат на биолошка терапија бидејќи ланските количини се потрошени а новиот тендер за ретки болести се уште е во процес на евалуација. Сали вели дека биле пријавени 13 компании за 46 лека и се надева нема да има застој бидејќи се заканува опасност за еден месец голем број пациенти да немаат терапија.

-Во очекување сум на финалното решение кога и јавно ќе излеземе и ќе кажеме кој конкурирал кој добил, вели Беким Сали.

Првиот човек во здравствениот систем коментирајќи го случајот со Теа уверува дека целта им е сите деца да имаат терапија и во буџетот да има пари за да може да интервенираат како за овој случај. Но дали она што следува во иднина дополнително ќе ги раздели пациентите бидејќи со ревидирање на позитивната листа ќе биде додадена и биолошка терапија, но не целата. Кој ќе одлучува за кој пациент ќе има а за кој не?

-Сигурно стручни лица ќе кажат. Една е понудата на пазар, второ финансиите и трето стручното мислење кои ќе кажат свој став и накрај тоа ќе се сублимира, вели Сали.

Малата Теа е само една од многуте пациенти соочени со вакви проблеми и таа јавно проговори и побара да го добие лекот за да не биде зависна од инвалидската количка. Нејзината приказна и крикот на мајката која вели дека секој ден го слуша плачот на ќерката поради вкочанетите раце и нозе трогна многу луѓе. Чекајќи на институциите хумани лица се понудија да им помогнат.

Извор: Сител

Share on Facebook

Tweet

Follow us

Save