Украинската амбасадорка го посети Бигорскиот манастир

Во посета на Свештената Бигорска обител вчера попладне беше амбасадорката на Украина во земјава Лариса Дир со свои соработници.

– Ценетите гости беа пречекани во духот на манастирското гостопримство. Најнапред од страна на браќата им беше раскажано за историјата, за содржините и за современата мисија на манастирот и Братството. Потоа нејзината екселенција оствари средба со нашиот старец, епископот Антаниски г. Партениј, во неговиот работен кабинет, информираа од Бигорски манастир.

На средбата, меѓу другото, разговарале и за воената агресија на Русија врз Украина.

– Владиката забележа дека нема православен Христијанин кој би иницирал или поддржал војна и завојувачки акции и ја осуди агресијата како начин за решавање на какви било несогласувања. Старецот уште еднаш го изрази нашето сострадание и поддршка за страдалниот народ во Украина, кој на своја кожа ги преживува стравотните зла на војната започната од Русија, а нејзината екселенција му се заблагодари на Старецот за искажаната солидарност, посочуваат од Бигорскиот манастир.

Владиката порачал дека Православието треба да служи „за мир и за единство во љубовта Божја на сите народи, во духот на универзалноста на Евангелието“.

Share on Facebook

Tweet

Follow us

Save