Црна Гора премина на онлајн настава поради дојавите за бомби во училиштата

Црногорското Министерство за образование денеска одлучи до крајот на неделата наставата во сите средни и основни училишта во таа земја да се одвива преку интернет.

Одлуката доаѓа откако два дена по ред беа евакуирани сите образовни институции поради лажни дојави за поставени бомби.

Како што е соопштено, ваквата одлука е донесена по препорака на Црногорската полициска управа, а за учениците е обезбеден континуитет на настава.

„Црногорското Министерство за образование во соработка со Полициската управа навремено ќе ја информира јавноста за сите понатамошни активности и препораки. Исто така денеска апелираме до сите граѓани да останат смирени и присебни и да ги почитуваат упатствата на Министерството и Полициската управа со цел заеднички да придонесеме за стабилност во новосоздадената состојба“, се вели во соопштението.

Вчера и денеска на интернет адресите на основните и средните училишта пристигнаа заканувачки пораки дека се поставени бомби, по што наставата е прекината, а учениците се евакуирани.

Пораките дошле од е-поштата Ричард Рамирез, а авторот се претставил како Владислав Поздњаков од руската екстремистичка група „Машка држава“.

Share on Facebook

Tweet

Follow us

Save