Спасовски со честитка за 8 Март: Можеме да се пофалиме дека 48% од раководните позиции во МВР се доверени на жени

Министерот за внатрешни работи, Оливер Спасовски во негово и во име на раководството на МВР утрово го честита 8 Март – Меѓународниот ден на жените, со желби за добро здравје и успеси на сите полиња. Спасовски порача дека во последниве неколку години МВР докажа дека постои и волја и желба отворено да се дискутира на темите за родова еднаквост и недискриминација, но и да се преземат конкретни чекори во создавањето на економски силни, одважни и самостојни жени и девојки.

-Денес навистина можеме да се пофалиме со еднаквост во одлучувањето, бидејќи на ниво на организационите единици во рамки на МВР 48% од раководните позиции се доверени на жени. Исполнетоста на принципот на застапеност на жени на раководни позиции е евидентна и во рамки на Бирото за јавна безбедност.

Така, жените се на раководни позиции на Оддели како помошници директорки, началнички, командирки на полициски станици или на полициски одделенија, жените се вклучени и во Одделот за специјални полициски операции, поточно во Единицата за брзо распоредување, Специјалната антитерористичка единица „Тигар“, жените ги покажуваат своите врвни професионални перформанси во Одделот за воздухопловни единици и Единицата за интервентна полиција, што порано не беше случај, наведе Спасовски на социјалните мрежи.

Тој информира дека ковиот Колективен договор помеѓу МВР и МПС е прв колективен договор во државната управа кај нас, во кој се употребуваат родовиот речник и терминологија, а во кој е предвиден и паричен надомест во висина од 100 евра во денарска противвредност на жени вработени во МВР кои ќе се реализираат како мајки, за секое новородено дете.

Share on Facebook

Tweet

Follow us

Save