(Видео) Летаа тупаници и солзавци: Германската полиција се судри со демонстранти во Лајпциг

Екстремно левичарските демонстранти се судрија со германската полиција во источниот град Лајпциг за време на викендот во немирите предизвикани од неодамнешната судска одлука со која една жена позната по антинацистички активизам и нејзините тројца соучесници беа испратени во затвор.

Немирите почнаа во средата откако судот во Дрезден осуди четворица левичари на затворски казни поради акти на насилство врз осомничени неонацисти. Во центарот на случајот беше 28-годишна студентка идентификувана како Лина Е, наводниот водач, на која ѝ беше одреден петгодишен притвор. Тројцата други добија казни од две години и пет месеци до три години и три месеци.

Во знак на протест против судската одлука, локалните активисти најавија марш наречен „Ден Х“. Иако беше забранет од локалните власти поради загриженост за безбедноста, собирот сепак привлече стотици демонстранти, а првичните проценки велат дека бројот на учесници е 1.500.

Демонстрациите започнаа мирно, но подоцна прераснаа во насилство, при што демонстрантите ги гаѓаа полицајците со камења и шишиња. Полицијата во Лајпциг соопшти дека од петокот во судирите биле повредени околу 50 полицајци, додавајќи дека се повредени и непознат број демонстранти.

Полицијата, исто така, тврдеше дека опколила околу 1.000 демонстранти додека уапсила 30 од нив. Покрај ова, до 50 лица беа приведени, но потоа ослободени до недела напладне. Полицијата покрена истрага и за сериозни нарушувања на мирот и напади врз полицајци.

На видеата од местото на настанот се гледа како полицајци и демонстранти се удираат со тупаници, при што некои полицајци користат и палки и солзавец за да ги растераат активистите.

Градоначалникот на Лајпциг Буркхард Јунг ги осуди постапките на левичарските демонстранти, опишувајќи ги како „луди деликвенти“, додека сојузната министерка за внатрешни работи Ненси Фезер зборуваше за „бесмислено насилство“ предводено од „левичарски екстремистички хаотични луѓе и бунтовници“.

Сепак, германската полиција беше под тешки критики од левичарските политичари, при што членот на локалниот парламент, Албрехт Палас, ја обвини за „провокативен пристап“, тврдејќи дека дејствува со непотребна грубост. Дополнително, уште двајца локални пратеници, Џулијан Нагел и Марко Боме, изјавија дека забраната на собранието на прво место е „скандалозен“ потег со кој се прекршени основните права.

И покрај критиките, Фезер истакна дека „секој што фрла камења, шишиња и запаливи средства врз полицајците мора да одговара“, ветувајќи дека властите „внимателно ќе ја следат“ ситуацијата во наредните денови.

ЛИНК од видеото