ДИРЕКТОРКАТА ХАЛИМИ: Благодарам на СДСМ за укажаната доверба, ќе работиме за поголема ефикасност и квалитет на услугите

Благодарам на партијата СДСМ за укажаната доверба да раководам со оваа институција, објави на Фејсбук Милкије Халими, поранешна градоначалничка на Општина Арачиново, која како кадар на СДСМ е избрана за генерален директор на Аеродроми на Македонија.

– Ќе работиме и ќе се фокусираме на интегрирање и склопување на системите на оваа институција со фокус на зголемување на квалитетот на услугите за сите корисници, како и зголемување на ефикасноста и ефективноста на работењето на институцијата генерално, напиша Халими на Фејсбук.

Таа е назначена за генерална директорка на АД Аеродроми на Македонија, во државна сопственост. На функцијата доаѓа со одлука на Надзорниот одбор на претпријатието кое управува со двата аеродрома – скопскиот и охридскиот, во делот кој не е под концесија на ТАВ, како и со спортските аеродроми. Халими е назначена по препорака на Владата која го задолжи Надзорниот одбор да го разреши досегашниот директор Трајче Ангеловски.

Халими за новата функција се заблагодари на матичната партија СДСМ и најави дека ќе се заложи за зголемување на квалитетот на услугите за корисниците.

Халими во 2017 година стана првата жена градоначалник на Арачиново, а по завршувањето на мандатот се вработи во Царинската управа. Таа го привлече вниманието на медиумите бидејќи за позицијата инспекторка во Царината конкурираше со завршено средно медицинско образование.

Share on Facebook

Tweet

Follow us

Save