Бојмацалиев: МВР во минатото затвораше телевизии, но да го почекаме извештајот за новинарот Салиу

Дополнителниот заменик министер за внатрешни работи Митко Бојмацалиев не го коментира апсењето на новинарот Фуркан Салиу, но рече дека техничкиот министер е од партија на која во минатото ѝ пречеа гласни новинари.

„Во моментов имаме министер од политичка партија која во минатото знаеше да се спротистави на гласните новинари и да затвора телевизии. Сосема е оправдано што граѓаните реагираат, јас нема повеќе ништо да додадам од она што е соопштено од МВР. Од денеска за тоа што се случувало, зошто и на кој начин е уапсен новинарот, вклучена е и внатрешна контрола, така што мојот коментар ќе го дадам по извештајот од спроведната контрола“, изјави Бојмацалиев денеска во Охрид.

На прашањето на новинарите дали можело и поинаку да се постапи, Бојмацалиев рече дека секогаш постојат повеќе начини да се постапува, а дали тоа бил исправниот начин тоа ќе го покаже внатрешната контрола по случајот.

Тој денеска имал состанок со раководството на СВР – Охрид на кој, како што рече, се разговарало и за тековната оперативна акција – претседателски и парламентарни избори 2024 година.

„Досега имаме одлична комуникација со сите политички партии и немаме индиции за нарушување на изборниот процес. А така ќе продолжиме во тесна комуникација и со граѓаните и со партиите со цел полицијата да биде на терен со нив и да го гарантираме изборниот процес“, рече Бојмацалиев.

Share on Facebook

Tweet

Follow us

Save