Критично на Блискиот Исток, Израел ликвидира уште еден командант на Хамас

Состојбата на Блискиот Исток на работ на катастрофа. Израелските одбранбени сили ликвидираа уште еден командант на милитантите на Хамас. САД испраќа дополнителни воени сили на Блискиот Исток. Меѓународната заедница продолжува со напорите за деескалација на состојбата која особено стана критична по убиството политичкиот лидер на Хамас, Ханије…

Ескалира на Блискиот Исток. Израелската војска изврши нови воздушни напади врз возило на милитантите во Тулкарм на окупираниот Западен Брег и во либанскиот град Тир. Хамас тврди-убиени се пет луѓе, меѓу нив и регионалниот командант на бригадата. Пентагон најавува испраќање повеќе воени сили на Блискиот Исток за да го заштитат Израел и американските трупи во регионот, по одмаздничките пораки од Иран, Хезболах и Хамас.

„Сите капацитети што ги имаме во регионот таму се одбранбени и со порака за одвраќање. САД ќе застанат со Израел во нивната самоодбрана. Не сакаме да видиме поширок регионален конфликт и ќе продолжиме да бараме деескалација, но најдобриот начин за тоа е постигнување договор за прекин на огнот“, изјави Сабрина Синг, портпарол во Пентагон.

Иранските власти уапсија десетици осомничени за вмешаност во атентатот врз Ханија во Техеран, меѓу нив и високи ирански разузнавачки и воени службеници. Стравуваат дека биле ангажирани од Мосад и дека е направено големо нарушување на безбедноста. Во истовреме, Ерусалим издаде инструкции до Израелците да ги подготват засолништата во случај на напади врз земјата. Од одбрана велат-подготвени се да одат далеку и да ризикуваат.

„Ова е нашата порака до целиот Блиски Исток – оние кои ги напаѓаат граѓаните на Израел, оние кои ја напаѓаат државата Израел-подготвени сме да одиме далеку, да собереме прецизни разузнавачки информации, да извршиме удари и да ризикуваме. Погодивме во Бејрут и напаѓаме во Газа, ќе бидеме силни во одбраната, а потоа ќе удриме многу силно“, изјави Херзи Халеви, началник на Генералштабот на израелската армија.

Во Газа продолжува притисокот и борбите против Хамас. Во екот на војната, Палестинците и натаму се борат да добијат соодветен пристап до храна и чиста вода.

„Се бориме да добиеме вода, стоиме во редици три до четири часа додека не наполниме две шишиња“, изјави раселен Палестинец.

ООН го вклучија алармот за појава на високо заразниот вирус-полио.

„Потребни се вакцини, но тековните борби и пречки и натаму значително го попречуваат влезот на помош во Газа“, изјави Фархан Хак, заменик портпарол на генералниот секретар на ОН.

Во услови на зголемени тензии и стравувања од поширок конфликт, Шведска најави затворање на амбасадата во Бејрут и ги повика своите граѓани да го напуштат Либан. И грчките безбедносни сили се во зголемена готовност од потенцијални терористички напади врз еврејски и израелски цели, а во Франција е издадена наредба за зајакнување на безбедноста на синагогите. Во истовреме, Тел Авив потврди дека израелска делегација заминува за Каиро да ги продолжи преговорите за договор за заложниците и прекин на огнот во Газа.

Share on Facebook

Tweet

Follow us

Save