Вучиќ побара одложување на американските санкции врз руските компании во Србија

Претседателот на Србија, Александар Вучиќ на денешната средба во Белград со американскиот заменик државен секретар за управување и ресурси, Ричард Верма, побарал подолг рок за примена на санкциите за нафтената индустрија на Србија (НИС), кои беа воведени затоа што компанијата е во мнозинска сопственост на Русија.

Вучиќ, како што пренесуваат српски медиуми, побарал разбирање од Америка и да ги поместат роковите за санкциите за 15-20 дена.

Во 2008 година НИС беше продаден на руски „Газпромнефт“, а во моментов според официјалните податоци, „Газпромнефт“ и „Газпром“ имаат 56,15 отсто сопственост, додека 29,87 отсто е во сопственост на српската држава.

По средбата, Верма изјави дека целта на санкциите е да се отстрани Русија од сопственичката структура на НИС и дека тоа ќе придонесе за повеќе мир во регионот и диверзификација на српските енергетски извори.

Тој тврди дека Србија нема да трпи економски последици доколку ја отстрани Русија од сопственичката структура на Нафтената индустрија на Србија (НИС).

НИС е само една од 2 000 компании во руска сопственост што САД ги ставија на „црната листа“.

Вучиќ рече дека Србија во наредниот период ќе се потпира на енергетските резерви и дека нема да има недостиг на гас или нафта.

Во меѓувреме Вучиќ соопшти и дека Азербејџан проследил известување дека во наредниот период нема да можат да испорачуваат 1,7 милиони кубни метри гас во Србија секој ден.

СПОДЕЛИ

Share on Facebook

Tweet

Follow us

Save