Полска го поддржува барањето на Трамп членките на НАТО да издвојуваат 5% од БДП за одбрана

Полска го поддржува барањето на американскиот претседател Доналд Трамп земјите од НАТО да издвојат 5 отсто од својот БДП за одбраната, изјави полскиот министер за одбрана Владислав Косињак-Камиш за Фајненшл Тајмс. Тој додаде дека неговата земја „може да биде трансатлантска врска помеѓу овој предизвик поставен од претседателот Трамп и неговата имплементација во Европа“.

Полска е членката на НАТО најблиску до исполнување на новата цел, трошејќи 4,7 отсто од БДП за одбрана оваа година, што е најголем процент во НАТО.

Пред неговото враќање во Белата куќа овој месец, Трамп го засили притисокот врз членките на НАТО да ги зголемат трошоците за одбрана, при што само 23 од нејзините 32 членки моментно ја исполнуваат целта за трошење од 2 отсто, а Италија и Шпанија се меѓу земјите на ЕУ кои се дури и под овој праг.

Косињац-Камиш рече дека новата цел е „важен повик за будење“ за алијансата. „Постигнувањето на целта на Трамп ќе потрае уште една деценија, но мислам дека тој не треба да биде критикуван за поставување навистина амбициозна цел, бидејќи во спротивно ќе има некои земји кои ќе продолжат да дебатираат дали навистина се потребни повеќе трошоци“, рече тој.

Откако Русија ја започна својата целосна инвазија на Украина во 2022 година, Полска ги удвои трошоците за одбрана и нарача оружје во вредност од милијарди долари, главно од САД и Јужна Кореја. Министерот изјави дека неговата влада нема друг избор со оглед на близината на земјата со Русија: „Купивме многу, но нашето место на мапата ги прави инвестициите и набавката на опрема едноставно неопходна“.

Варшава сака да го искористи шестмесечното ротирачко претседавање со ЕУ, кое започна на 1 јануари, за да ги убеди другите земји-членки да потрошат 100 милијарди евра од следниот генерален буџет за одбрана. Разговорите за седумгодишниот буџет, кој ќе започне во 2028 година, треба да започнат оваа година. Минатата година Европската комисија предложи програма за одбранбената индустрија во вредност од 1,5 милијарди. евра, што Косињак-Камиш го дефинираше како јасно недоволно.

Share on Facebook

Tweet

Follow us

Save