НАТО подготвен за секој ризик: „Ќе одговараме на начин, време и домен по наш избор“

По состанокот на Северноатлантскиот совет, сојузниците издадоа силна изјава за солидарност и решителност, осудувајќи ги неодговорните и ескалирачки постапки на Русија, кои, според нив, се ризични, погрешно проценети и го загрозуваат животот на луѓето. „Не сакаме да видиме продолжување на овој опасен тренд, намерен или не, и сме подготвени да ја браниме секоја педа од сојузничката територија“, истакна холандскиот премиер Марк Руте.

Консултациите во Советот биле одржани по барање на Естонија, откако три руски ловци МиГ-31 во петокот го нарушиле естонскиот воздушен простор, на што НАТО реагирал веднаш. Руте потенцира дека ова е доказ за подготвеноста на Алијансата да реагира на секој потенцијален ризик, по копно, море и воздух.

Генералниот секретар на НАТО истакна дека врховниот командант на сојузничките сили во Европа, генерал Алексиус Гринкевич, располага со сите потребни алатки и овластувања за да ја гарантира одбраната на сојузниците, која ќе биде дополнително зајакната со иницијативата „Источна стража“ за заштита на Источното крило на Алијансата.

„Сојузниците продолжуваат да тренираат за да бидат подготвени за какви било закани. Најголемиот носач на авиони во светот, ‘Џералд Форд’, е во соседството и тренира со сојузниците од целиот континент, зајакнувајќи ја нашата способност да дејствуваме заедно“, додаде Руте.

Северноатлантскиот совет во својата изјава исто така нагласи дека неодговорните упади на Русија нема да ги обесхрабрат сојузниците во поддршката на Украина и во нејзиното право на самоодбрана против руската агресивна војна. „Ќе продолжиме да одговараме на начин, време и домен по наш избор, со целосна решителност“, заклучи Руте.

Share on Facebook

Tweet

Follow us

Save