Полска привремено затвори два аеродроми поради руските напади врз Украина

Полска привремено ги затвори аеродромите во Жешов и Лублин откако полските вооружени сили подигнаа борбени авиони како одговор на руските воздушни напади врз Украина, објавија светските агенции, повикувајќи се на извештај на Полската агенција за воздушна навигација објавен на Икс.

Руските сили нападнаа неколку области во регионот Киев, предизвикувајќи повреди и штети на станбени згради, градилишта и претпријатија, соопшти регионалната воена администрација на Киев на Телеграм, цитирана од Укринформ. Едно лице е повредено во регионот Ивано-Франкивск, кое возело во времето на нападот и било хоспитализирано во локална болница.

Белата куќа соопшти дека американскиот претседател Доналд Трамп ќе се сретне со украинскиот претседател Володимир Зеленски утре во Палм Бич, Флорида. Билатералната средба е закажана за 15:00 часот по локално време и ќе биде посветена на продолжување на разговорите за напорите за завршување на војната во Украина.

Сè уште не е јасно дали ќе има какви било преговори со Русија, бидејќи Москва не се спомнува во официјалното соопштение на Белата куќа.

Share on Facebook

Tweet

Follow us

Save