Се огласи Захарова: „Ќе одговарате за ова“

Портпаролката на руското Министерство за надворешни работи, Марија Захарова, го обвини украинскиот претседател Володимир Зеленски дека лаже откако тој негираше напад со беспилотни летала врз резиденцијата на рускиот претседател Владимир Путин.

Украинскиот претседател Володимир Зеленски лаже, режимот во Киев ќе биде одговорен за своите злосторства, изјави денес портпаролката на руското Министерство за надворешни работи, Марија Захарова, коментирајќи го негирањето на Зеленски дека украинските сили ја таргетирале резиденцијата на рускиот претседател Владимир Путин со беспилотни летала.

Таа, на својот Телеграм канал, го привлече вниманието на медиумските извештаи дека „Зеленски ја оценил изјавата на (рускиот министер за надворешни работи Сергеј) Лавров за нападот врз резиденцијата на Путин како лаги“, објави Спутник.

„Изјавите на Зеленски за Буча се лаги. Изјавите на Зеленски за децата наводно киднапирани од Русија се лаги. Изјавите на Зеленски за неподготвеноста на Русија да преговара се лаги. Но, зборовите на Лавров се вистинити, а режимот во Киев ќе биде одговорен за овие злосторства“, нагласи Захарова.

Претходно денес, Лавров изјави дека ноќта помеѓу неделата и понеделникот, Киев извршил терористички напад врз резиденцијата на рускиот претседател во Новгородската област, користејќи 91 беспилотно летало. Тој рече дека „Русија ги утврдила целите за одмазднички напади, како и времето на нивното спроведување“.

После тоа, Зеленски се огласи и го негираше нападот врз претседателската резиденција.

Share on Facebook

Tweet

Follow us

Save