Ројтерс: ОАЕ го напуштаат ОПЕК+

Обединетите Арапски Емирати (ОАЕ) објавија дека ја напуштаат Организацијата на земјите извознички на нафта (ОПЕК) и проширениот формат ОПЕК+.

Ова е сериозен удар врз координацијата меѓу водечките производители на нафта во контекст на продлабочувањето на енергетската криза и конфликтот во Иран, објави Ројтерс.

Заминувањето на клучен играч како ОАЕ ја доведува во прашање иднината на нафтениот картел, кој досега одржуваше заедничка политика и покрај разликите меѓу земјите-членки по прашања како што се производствените квоти и геополитичките позиции. Ситуацијата е дополнително комплицирана од тензиите во регионот на Ормутскиот теснец – клучен пат низ кој обично поминува околу една петтина од светскиот извоз на сурова нафта и течен природен гас.

Поради иранските закани и нападите врз бродови, сообраќајот низ теснецот останува сериозно отежнат, што го ограничува извозот од земјите од Персискиот Залив. Анвар Гаргаш, дипломатски советник на претседателот на ОАЕ, во понеделник изјави дека одговорот на земјите од Заливот на иранските напади бил несоодветен.

„Земјите од Советот за соработка во Заливот обезбедија логистичка поддршка, но политички и воено одговорот беше најслабиот во историјата“, критикуваше Гаргаш на регионален форум.

„Одлуката на ОАЕ е победа за американскиот претседател Доналд Трамп, кој постојано го критикуваше ОПЕК за одржување на високите цени на нафтата. Тој ја обвинува организацијата за вештачко ограничување на понудата и искористување на безбедноста што ја обезбедуваат САД во регионот“, објави Ројтерс. Аналитичарите предупредија дека заминувањето на ОАЕ може да доведе до понатамошна нестабилност на пазарите на нафта и да ја ослабне способноста на ОПЕК+ да одговори на остри ценовни промени.

Share on Facebook

Tweet

Follow us

Save