Фрчкоски: Со укинувањето на Пржинската влада, ВМРО го сруши и последниот штит за правични и демократски избори.

Членот на Извршниот одбор на СДСМ, Јон Фрчкоски, во емисијата „Само интервју“ на телевизија Канал 5, истакна дека со усвојувањето на последните измените на Законот за Влада и укинувањето на Пржинската влада, власта на ВМРО го уништи и последниот заштитен механизам за фер и демократски избори. Фрчкоски објасни дека овој потег ја нарушува важната структура за изборна рамнотежа и контрола, која беше воспоставена со консензус и под меѓународен надзор. „Вчера фактички се уништи и последниот услов за демократски избори во Македонија, особено со оглед на тоа каква организирана група ја води државата. Овој закон беше донесен на незаконски начин, иако првично беше постигнат консензус помеѓу четирите партии, со поддршка од меѓународната заедница, вклучувајќи ја и Европската Унија како и САД“, изјави Фрчкоски.

Тој потсети дека ВМРО, предводено од сегашниот премиер Мицкоски, во периодот на владеењето на СДСМ, инсистирало техничката влада да остане, но сега нивните ставови се променети. Фрчкоски нагласи дека власта е оптоварена со корупциски скандали и дека токму затоа избегнува фер изборен процес. „Оваа влада е опседната со корупција. Суштински, таа се плаши од реализација на фер и демократски избори. Христијан Мицкоски беше оној што инсистираше на задржување на законот, нагласувајќи дека тоа ќе важи до влезот во Европската Унија. Но, важно е да се напомене дека таквите потези доаѓаат од влада исполнета со страв и паника. Доколку не размислуваат да организираат избори веднаш, тоа значи дека им падна рејтингот“, рече Фрчкоски.

Тој нагласи дека реакциите на СДСМ не произлегуваат од страв, туку од принципиелната потреба за заштита на изборниот процес, така што граѓаните ќе имаат шанса да учествуваат на фер избори. „Ние не реагираме од страв, туку за да ја одбраниме демократската основа и да обезбедиме фер услови за граѓаните. Оваа влада е глува на здравите аргументи и слуша само свои интереси, и она што се гледа е најчесто бизнис интерес“, истакна Фрчкоски. Во интервјуто, тој посочи дека ваквото однесување на власта и укинувањето на техничката влада е резултат на страв и пад на рејтингот. „Клучно е да разберат дека нивните чекори создаваат сомнежи за вистинските намери, вклучувајќи ја и можноста за брзи избори. Оној што постојано создава алиби и подготвува терен за брзи избори, бидејќи веројатно нема средства и политики за успешно владеење, е самиот премиер и неговата партија“, заврши Фрчкоски.

Share on Facebook

Tweet

Follow us

Save