Жената осомничена за бомбашкиот напад врз украинскиот бизнисмен во Монако е пронајдена мртва кај Киев

Tело на жена е пронајдено во близина на Киев, за кое постои сомневање дека е на осомничената за обидот за атентат врз украинскиот бизнисмен Вадим Јермолаев во Монако, објави „Украинска правда“.

Според украинските медиуми, телото е пронајдено синоќа, а според неофицијални информации, починатото лице е застрелано.

На 3 јули, Интерпол издаде црвена потерница по Анастасија Березовски, 39-годишна државјанка на Украина, која е назначена за главен осомничен за експлозијата во Монако вечерта на 29 јуни, во која украинскиот бизнисмен Вадим Јермолаев беше ранет.

Интерпол објави и две фотографии од осомничената со известување на кое се вели дека има тетоважа, за која се верува дека прикажува змија, на десната рака од рамото до лактот. Се вели дека е родена во Украина, има темна коса и зборува германски јазик.

Березовска последен пат беше видена како бега од Монако откако со активирање на експлозивна направа се обиде да го убие 58-годишниот олигарх Вадим Јермолаев, неговата љубовница, 46-годишната Ана Насобина, и нивниот син.

Според властите во Монако, осомничената наводно се преправила во маж за време на нападот, објави Си-ен-ен.

Според некои извори од органите за спроведување на законот, двајца осомничени веќе се приведени како дел од истрагата. „Украинска правда“ тврди дека едниот од нив е активен член на Главната разузнавачка дирекција (GUR), а другиот е поранешен член на органите за спроведување на законот.

Јермолаев, кој беше цел на нападот, во меѓувреме излезе од кома и се опоравува во болница во Марсеј. Насобина е сè уште во критична состојба откако во понеделник вечерта беше пренесена во болницата Пастер во Ница и ѝ била извршена ампутација на двете нозе.

Share on Facebook

Tweet

Follow us

Save