Уапсен маж во Унгарија: Бркал 22 годишна жена со автомобил, ја оттурнал од патот и пукал со гумени куршуми

Педесетгодишен маж е уапсен во Унгарија откако со автомобил бркал 22-годишна жена што ја познавал, намерно удрил во нејзиното возило, а потоа пукал кон неа со пиштол што испукува гумени куршуми.

Инцидентот се случил во вторникот на патот меѓу местата Валко и Дањ. Според унгарската полиција, осомничениот најпрво го следел автомобилот во кој се наоѓала 22-годишната жена, а за време на потерата наводно испукал неколку истрели кон возилото. Потоа намерно удрил во него, по што двата автомобили излетале од патот и завршиле во ограда на приватен имот.

Во судирот, 22-годишната жена се здобила со полесни повреди.

По несреќата, напаѓачот излегол од автомобилот со оружје во раката и тргнал кон лицата што биле во другото возило. Тие почнале да бегаат, а тој повторно пукал по нив. Според полицијата, во пукањето никој не бил повреден.

Полицајците набргу пристигнале на местото на настанот и го уапсиле 50-годишниот Иштван К. При претрес на неговиот автомобил и дом биле пронајдени и одземени ерсофт-оружје, гасен пиштол што испукува гумени куршуми, како и гасни патрони и муниција.

Против него е поведена истрага за загрозување на безбедноста во сообраќајот и насилничко однесување со оружје, а обвинителството предложило да му биде одреден притвор.

Постапка е поведена и против 22-годишната жена, бидејќи во нејзиниот автомобил биле пронајдени материи за кои постои сомнение дека се дрога. Исто така, било утврдено дека управувала со возилото без возачка дозвола, па против неа се води посебна истрага за поседување дрога и возење без возачка дозвола.

Share on Facebook

Tweet

Follow us

Save