INFOMAX.MK

Италија треба да го прекине договорот со Албанија за притвор на мигранти бидејќи тоа ги загрозува безбедноста, слободата и човековите права на барателите на азил и мигрантите, повика „Амнести интернешнл“.

Во извештајот, во кој се разгледува договорот од 2023 година, организацијата за човекови права соопшти дека стотици луѓе биле присилно пренесени во објекти во Албанија, каде што ограничениот пристап до адвокати и судови ја поткопува нивната можност да побараат азил и да добијат правда.

„Офшор-притворањето во крајна линија има цел да дејствува како средство за одвраќање и претставува обид да се префрлат и избегнат одговорностите за справување со миграцијата на луѓето и обврската за обезбедување азил за оние на кои им е потребен“, изјави Ив Геди, директорка на Канцеларијата на „Амнести интернешнл“ за европски институции.

Според „Амнести“, Италија директно од меѓународни води пренела 74 лица во Албанија во текот на три операции меѓу октомври 2024 и јануари 2025 година.

Трансферите биле прекинати откако италијанските судови ги поништиле наредбите за притвор. Меѓутоа, Рим го изменил договорот во март 2025 година за да им овозможи на мажите што се соочуваат со наредби за протерување и кои веќе се притворени во Италија да бидат пренесени во Албанија.

Оттогаш, според организацијата, повеќе од 500 претежно расно дискриминирани мажи биле испратени во притворниот центар во Ѓадер.

„Амнести“ документираше 42 критични инциденти во објектот меѓу 11 април и 16 мај 2025 година, вклучително и најмалку два обида за бесење, неколку случаи на самоповредување и протест во кој три лица биле повредени од скршено стакло.

Организацијата, исто така, ја обвини италијанската Влада за ограничување на независниот и парламентарниот надзор.

Иако лицата притворени во Албанија остануваат под италијанска јурисдикција, нивната оддалеченост од Италија и ограничениот пристап до адвокати, судови и други гаранции го ослабуваат нивното право да побараат азил и да имаат пристап до правда, соопшти Амнести.

„Сосема е јасно дека моделот Италија-Албанија е невозможно да се спроведе во согласност со обврските на Италија во областа на човековите права“, рече Геди.

„Амнести“ ги повика италијанските власти да го раскинат договорот, да користат алтернативи на притворањето и да обезбедат пристап до ефикасни процедури за азил и достоинствен прием на италијанска територија.

Петгодишниот договор стапи на сила во февруари 2024 година. Италија, според наводите, издвојува повеќе од 670 милиони евра за негово спроведување до 2028 година.