Мицкоски: Скопското Кале ќе се обнови и ќе стане значајна туристичка атракција

Претседателот на Владата, Христијан Мицкоски, денеска изврши увид во завршните активности за обновување и ставање во функција на двата музејски објекта на Скопското Кале – Музејот на праисторија и Музејот на османлискиот период.

Мицкоски најави дека во периодот што следува Калето треба да добие нов изглед и подобрена функционалност, со цел локалитетот да прерасне во една од позначајните туристички атракции во главниот град.

Според него, Владата ќе обезбеди финансиска и логистичка поддршка за реализација на планираните активности и за целосно уредување на просторот.

Премиерот посочи дека активностите треба да започнат во текот на оваа година, а доколку сè се одвива според планот, Скопското Кале би требало да го добие посакуваниот изглед во текот на следната година.

Тој оцени дека досегашното уредување, вклучително и хортикултурното средување, не е доволно и дека локалитетот има многу поголем туристички и културен потенцијал.

Мицкоски истакна и дека целта е Калето да биде целосно ставено во функција и да стане дел од програмата „Скопје – Европска престолнина на културата 2028“.

Share on Facebook

Tweet

Follow us

Save