Во пристаништето Драч, запленети 107,7 килограми канабис со многу високо ниво на THC, пристигнати од Канада

Албанската полиција во рамки на операцијата „Сидро 2“, во пристаништето Драч заплени 107,7 килограми канабис „Гелато“, со многу високо ниво на THC, чија вредност на нарко пазарот се проценува на околу 1,2 милиони евра.

Дрогата била откриена при детален преглед на контејнер што пристигнал од Канада, во кој имало 2 возила и 1 кампер.

-При претресот на камперот, во модифицирани простори покриени со дрвена облога, пронајдени се скриени 190 пакувања со сомнителна наркотична дрога канабис сатива „Џелато“, со вкупна тежина од 107,7 кг“. Исто така, при претресот, како материјален доказ беа запленети 43 електронски цигари, од кои некои имаа натписи со кои се декларира висока содржина на THC, соопшти полицијата.

Според истражните дејствија наркотиците се набавени во Канада и транспортирани во Албанија, но не е позната крајната дестинација.Две лица се осомничени за кривично дело „Трговија со дрога“, за кои, од причини на истрагата, генералиите не се откриваат.

Операцијата ја спровеле Секторот за истраги за наркотици при Полициската управа Драч, под раководство на Обвинителството при Основниот суд од општа надлежност од истиот град, во соработка со Локалната дирекција за граници и миграција и царинските структури на Пристаништето Драч.

Share on Facebook

Tweet

Follow us

Save