Мицкоски: Мојата задача како премиер не е да се занимавам со коски кои припаѓаат на минатото, туку со обезбедување иднина која им припаѓа на нашите деца

Премиерот Христијан Мицкоски, во своето обраќање по повод 23 Октомври – Денот на македонската револуционерна борба, истакна дека слободата и државноста носат одговорност за зачувување на македонскиот идентитет и создавање подобра иднина за идните генерации.

Осврнувајќи се на историското значење на формирањето на ВМРО и жртвата на македонските револуционери, Мицкоски порача дека денешните генерации имаат обврска да го продолжат нивниот идеал преку работа, посветеност и градење држава во која граѓаните ќе можат достоинствено да живеат.

„Свои на своето. Со корен во минатото и со верба во иднината“, порача премиерот, нагласувајќи дека македонското име, јазик, култура и историско паметење се вредности што треба да се зачуваат и да им се пренесат на децата.

За малите народи, иднината е во мудроста и единството, порача Мицкоски.

Говорејќи за евроинтегративниот процес, премиерот оцени дека Македонија поминува низ долг и тежок пат кон Европската Унија, обременет со услови, билатерални спорови и разочарувања. Сепак, тој порача дека земјата треба да продолжи да се бори за своето место во европското семејство, но преку мудар и внимателен пристап.

„Јас на политиката не гледам како на натпревар во мускули, туку повеќе како на партија шах. И големите се победуваат со мудрост“, истакна Мицкоски.

Осврнувајќи се на односите со Бугарија, тој рече дека членството во ЕУ е важно за Македонија и поради можноста државата да учествува во процесите на одлучување и рамноправно да ги застапува своите позиции.

Мицкоски упати критики за користењето на билатералните прашања во евроинтегративниот процес, тврдејќи дека Бугарија по влезот во Европската Унија добила можност да ги користи механизмите на Унијата во односите со Македонија.

Тој нагласи дека нема да отстапи од политиката што ја смета за заштита на националните интереси и дека нема да дозволи притисоците да ја променат неговата позиција.

„Мојата задача како премиер не е да се занимавам со коски кои припаѓаат на минатото, туку со обезбедување иднина која им припаѓа на нашите деца“, порача Мицкоски.

„Ниту еден притисок не може да го избрише Гоце Делчев“

Во обраќањето, премиерот посебно се осврна на историското паметење и ликот на Гоце Делчев, нагласувајќи дека македонската историја и националниот идентитет не можат да зависат од туѓо одобрување.

„Нашето паметење не подлежи на нивно одобрување. Ниту еден притисок не може да го избрише Гоце Делчев од срцето на македонскиот народ“, истакна Мицкоски.

Тој додаде дека државата треба да дејствува со разум и принципи, наместо да реагира импулсивно на провокации и притисоци.

Премиерот предупреди и на можни обиди за создавање внатрешни поделби преку, како што рече, вештачки наметнати прашања и нагласени етнички теми. Тој ги повика граѓаните да бидат внимателни и да не дозволат политичките тензии да ја загрозат стабилноста на државата.

Над 1.200 проекти и инвестиции во инфраструктурата

Осврнувајќи се на работата на Владата, Мицкоски ги посочи инфраструктурните и економските проекти како дел од одговорот на критиките на опозицијата.

Тој наведе дека се работи на шест автопатски делници, два гасоводни интерконектори и далекувод, а најави и продолжување на инвестициите во железничката инфраструктура и образованието.

Мицкоски посочи дека повеќе од 90 милиони евра се вложени во образовната инфраструктура, додека повеќе од половина милијарда евра се алоцирани за општински проекти. Според неговото обраќање, станува збор за повеќе од 1.200 проекти наменети за подобрување на условите за живот во локалните средини.

Премиерот изнесе и оценка дека Македонија има една од најниските стапки на инфлација во Европа и регионот, нагласувајќи дека постигнатите резултати се резултат на работата на Владата и нејзините соработници.

„Колку ниско и да напаѓаат тие, ние ќе одговараме со работа и енергија“, порача Мицкоски.

„Функцијата е привремена, а последиците од нашите одлуки остануваат“

Во завршницата на своето обраќање, Мицкоски се осврна на секојдневните проблеми на граѓаните, посочувајќи дека многумина се уморни од ветувања, се соочуваат со финансиски предизвици и се загрижени за иднината на своите деца.

Тој нагласи дека носителите на јавните функции мора да покажат скромност, одговорност и почит кон граѓаните, а државата треба да обезбеди еднаквост пред законот и можности за напредување врз основа на знаењето, трудот и способноста.

„Слободата добива целосна смисла кога граѓанинот може слободно да зборува, чесно да заработува и спокојно да го планира животот. Кога законот важи еднакво за влијателниот и за обичниот човек“, истакна премиерот.

Тој порача дека вистинскиот успех на денешните генерации ќе биде ако идните поколенија можат да кажат дека нивните родители верувале во Македонија, останале исправени во тешките моменти и им оставиле држава во која вреди да се живее.

„Ова е нашиот дом. Ова е нашето време. Ова е нашата одговорност. Свои на своето — денес и за сите што доаѓаат по нас!“, порача Мицкоски, честитајќи го 23 Октомври – Денот на македонската револуционерна борба.

Share on Facebook

Tweet

Follow us

Save