INFOMAX.MK

НАСА објави нова панорамска снимка од Марс направена од роверот „Кјуриосити“, на која утринската сончева светлина ги осветлува далечните карпести гребени на Црвената Планета.

Снимката е направена со камерата Mastcam на 11 август, околу 8:30 часот по локално марсовско време, а составена е од шест фотографии споени во една панорама. За разлика од повеќето фотографии на „Кјуриосити“, оваа е обработена без вообичаеното балансирање на белата боја, со што е зачуван изгледот на раното марсовско утро.

Во далечината се гледаат необични карпести формации познати како јарданзи, кои со милиони години биле обликувани од ветерот. Тие се дел од слој долг околу 16 километри на северозападниот дел на планината Шарп.

„Овој слој изгледа како да не припаѓа таму. Има поинаква боја, слоевите се наклонети под необичен агол и речиси изгледа како да е залепен врз планината“, изјави научникот Ешвин Васавада од Лабораторијата за млазен погон на НАСА.

Една од теориите е дека формациите можеби настанале од вулканска пепел која се наталожила во кратерот пред милијарди години, а подоцна била обликувана од ерозијата и силните марсовски ветрови.

„Кјуриосити“ слета во кратерот Гејл во 2012 година, а од 2014 година постепено се искачува по планината Шарп, висока околу пет километри. Неодамна роверот достигна вкупно висинско искачување од еден километар – најголемо досега постигнато од ровер на Марс.

Слоевите на планината Шарп содржат траги од различни периоди од историјата на Марс и им помагаат на научниците да откријат како планетата од некогаш повлажна средина, со езера и потоци, се претворила во сувиот свет што го познаваме денес.

НАСА очекува „Кјуриосити“ во текот на 2027 година да стигне до основата на јарданзите, каде со своите инструменти ќе може детално да го проучи нивниот состав и потекло.

📍Gale Crater, Aug. 11, 2026, 8:30 a.m. local Mars time.

The Curiosity rover captures the Sun rising on crags known as yardangs, a scene that scientists have long been waiting to see up close. 1/2 https://t.co/NJQH9yNEYR

— NASA Mars (@NASAMars) October 6, 2026