Силно торнадо во Полска оштети куќи и откорна дрвја

Силно торнадо е пријавено во Полска, откако невреме попладнево помина низ јужниот дел на земјата, оставајќи зад себе оштетени куќи, соборени дрвја и уништена инфраструктура, пренесува ТВП Ворлд.

Метеоролозите соопштија дека торнадото се формирало како дел од силна грмотевична бура и директно погодило неколку населени места во регионот Ополе. Според прелиминарните проценки на полското Здружение на ловци на бури, брзината на ветерот во самиот вртлог достигнувала и до 200 километри на час.

Пожарникарските служби примиле десетици итни повици за помош поврзани со паднати дрвја, прекинати далеководи и покриви буквално откорнати од куќите. Силниот ветер оштетил најмалку 11 згради, вклучувајќи и пет станбени објекти. Две станбени згради се прогласени за целосно небезбедни и неупотребливи за живеење. Голем дел од погодените населби се соочуваат со прекини во снабдувањето со електрична енергија поради паднатите столбови.

Локалното население го опишува невремето како исклучително ненадејно и интензивно. Жителите раскажуваат дека немале време ниту да сфатат што точно се случува пред силниот вртлог да го погоди нивниот регион.

„Сè се случи буквално во еден момент. Траеше можеби едвај пет минути. Кај соседот имаше голема штала, а сега таму нема ништо. Имаше цврст покрив, а сега сè е збришано“, раскажува еден од потресените мештани за локалните медиуми.

И покрај огромната разорна моќ на торнадото и сериозните материјални штети, за среќа, нема пријавено повредени или загинати лица, потврдија општинските власти.

Официјалните лица соопштија дека на погодените жители веднаш им е пружена ургентна поддршка на терен, вклучително и стручна психолошка помош за претрпениот шок, додека специјални тимови продолжуваат со детална проценка на вкупната материјална штета.

Share on Facebook

Tweet

Follow us

Save