Трагедија во Истанбул: Се урнаа три ката од седумкатница, две лица загинаа

Најмалку две лица загинаа откако утрово делумно се урна седумкатна станбена зграда во истанбулската населба Малтепе, соопштија локалните власти. Спасувачките екипи продолжуваат со потрагата по луѓе за кои се верува дека сè уште се под урнатините.

Урнати се долните три ката од објектот, вклучително и приземјето каде што имало деловен простор. Од под урнатините досега се спасени осум лица, меѓу кои и деца, додека жителите од деловите на зградата што останале стабилни биле евакуирани.

Инцидентот се случил околу 5:40 часот наутро во населбата Џевизли, на азиската страна на Истанбул. Причината за уривањето засега не е позната, а започната е истрага.

Спасувачката операција е отежната поради опасноста од дополнително уривање на зградата, поради што превентивно биле евакуирани и жители од соседните објекти.

Зградата била изградена во 1987 година, а според официјалните податоци во неа биле регистрирани 33 жители.

Дел од станарите за локалните медиуми изјавиле дека претходно се разговарало за санација на зградата, а некои тврделе дека почувствувале вибрации откако бил отворен деловен објект во приземјето. Овие тврдења засега не се потврдени како причина за уривањето.

Share on Facebook

Tweet

Follow us

Save