Викендов избегнувајте патување во Србија

Српското јавно претпријатие „Патишта на Србија“ упати апел до возачите да не тргнуваат на пат без итна потреба и да бидат особено внимателни во ноќта меѓу сабота и недела, кога се очекува нагло влошување на условите на коловозите.

Според предупредување на Републичкиот хидрометеоролошки завод, во ноќта меѓу 3 и 4 јануари се најавуваат врнежи од дожд што ќе замрзнуваат на тлото, додека во северните и источните делови на Србија се прогнозира пообилен снег. Токму комбинацијата на леден дожд и снег е ризикот што најбрзо го претвора патот во клизалиште и ги прави непредвидливи и најкратките релации.

Од „Патишта на Србија“ препорачуваат, доколку патувањето е неизбежно, возачите задолжително да имаат целосна зимска опрема и синџири, да ја прилагодат брзината и строго да ги почитуваат ограничувањата, затоа што условите може да се менуваат од километар до километар.

Share on Facebook

Tweet

Follow us

Save