Во Карпош застрелано улично куче среде бел ден

Вчера 27.02 после пладне (13.10 часот), на единствениот телефонски број за итни случаи Е-112 граѓанин пријавил дека има застрелано куче на улица „Борка Талевски“ број 70 на територија на Општина Карпош, информираат од Центарот за управување со кризи (ЦУК).

-Веднаш, по трансферираниот повик од 112 во Секторот за операции и координација на ЦУК, Регионалниот ЦУК Скопје ги известил комуналниот инспектор на Град Скопје, Локалната самоуправа – Општина Карпош и Центар за информации и комуникација на МВР за понатамошна постапка, согласно процедурите на известените институции при вакви случаи. Истражувањето на случајот и утврдувањето на фактите при ваквите и слични случаи, како и преземањето оперативни активности е во насока за придонес за зголемување на безбедноста на граѓаните.
Од Секторот за операции и координација при ЦУК, во 15.00 часот, е извршено повторно јавување за следење на континуитетот на пријавениот случај, согласно стандардните оперативни процедури: прво до комуналниот инспектор на Градот Скопје – кој потврдил дека е јавено на Комунална хигиена; второ до контакт лицата од Локалната самоуправа, Општина Карпош – при што повратно е добиено известување дека биле известени потребните институции за отстранување на телото на кучето и потоа трето, до надлежните од Полицијата – што потврдиле дека била пратена екипа за увид на настанот, согласно процедурите при вакви случаи, соопштуваат од ЦУК.

Потоа, при комуникацијата и координацијата на активностите за конкретниот случај за застрелано куче во Скопје, Дежурниот оперативен центар на Секторот за операции и координација при ЦУК, после телефонска комуникација и контакт со надлежните служби на МВР, согласно оперативните стандардни процедури на ЦУК и по пат на електронски „имеил“ службени пораки ја продолжи комуникацијата интерес за повратни информации за пријавениот случај за застрелано куче во Општина Карпош, во корелација со процедурите и надлежностите на институциите од системот за управување со кризи.

-Се очекува истражувањето на случајот и утврдувањето на фактите при ваквите и слични случаи да придонесе за зголемување на безбедноста на граѓаните. ЦУК, во веќе познатата насока дека е безбедноста на прво место, кога ќе бидат добиени нови информации за конкретниот случај за застрелано куче во Скопје, ќе ги сподели со медиумите и јавноста, потенцираат од ЦУК.

За немилиот настан вчера имаше и бројни реакции на социјалните мрежи.

-Маалскиот миленик Тоби од Млечен, мирно куче кое сите таму го чуваа и хранеа, денеска за жал го пронајдоа УБИЕН И ПУКАН со ПУШКА спроти Сидро. Некој монструм се дрзнал насред Карпош да пука со пушка во најмирно куче НАСРЕД БЕЛ ДЕН, помеѓу 8:30 и 09:00 утрово. До кога ќе се дозволува вакви психопати да шетаат слободно? Пред некое време во близина беше пукано и во нашиот маалски миленик Џамбо и ништо чудно да се работи за истата будала што може утре да пука и во човек. Доколку некој има некакви информации, ве молам споделете да помогнеме на МВР побрзо да се пронајде, објави активистката за заштита на животните Тина Мицковска.

Share on Facebook

Tweet

Follow us

Save