Димитар Апасиев, Левица: Историјата ни се повторува, а пред нас е идеолошката поделба на партизани, врховисти и балисти

Со „пасокизацијата“ на СДСМ завршен е првиот дел од задачата на Левица, која во идниот парламентарен состав ќе биде деконструктивна опозиција на власта, поставена на идеолошката борба помеѓу левицата и десницата, вели Димитар Апасиев, претседателот на Левица.

Во утринската програма на Слободен печат тој се осврна на новата парламентарна колација во создавање, помеѓу ВМРО-ДПМНЕ и „Вреди“.

– „Вреди“ се необалисти и тоа е многу опасно. Тие се отворено со карти на „Голема Албанија“, видете ги спомениците на оние „кољачите“ во Гостивар, сквернавењето на спомениците на македонското знаме, тоа е сè нивно масло. Тие што сега доаѓаат се полоши, бидејќи не ја чувствуваат државата за своја. И овие претходниве од ДУИ не ја чувствуваа за своја, ама беа приморани да играт по некои западни ноти, бидејќи на врат им висеа хашки случаи – изјави Апасиев.

Тој смета дека на македонија ѝ се случува враќање на историјата и судир на партизани и балисти, како и на партизани против врховисти.

– Ние ја враќаме историја во еден т.н. хегелијански процес и судир на левица и десница и борба на партизани, врховисти и балисти – посочи Апасиев.

Како алтернатива на актуелниот систем тој го предлага „социјализм на македонски начин“, како аналогија на кинескиот социјализам. Апасиев тврди дека „Западот е во процес на декаденција, за разлика од Кина која е во голем подем“. Ваквата состојба во геополитиката, според него ќе доведе до огромни поместувања во меѓународните односи кои ќе донесат промени и кај нас, по што ќе биде возможно да се воспостави социјализам и во Македонија.

Тој е уверен дека држава од типот на поранешна Југославија е единственото место во кое балканските народи можат во потполност да се реализираат и да водат сериозна политика.

– Првата мантра е дека Југославија била презадолжена и благодарение на странските кредити се живеело. Фактографијата е сосем спротивна, сега ние, екс-ју републиките, сме седумкратно позадолжени од Југославија кога пропадна. Што вие гледате материјално како бенефит? Еве ние треба седум пати подобро да живееме според таа логика, така – прашува Апасиев.

Share on Facebook

Tweet

Follow us

Save