Идниот британски премиер планира ново дупчење на нафта во Северното Море

Новиот лидер на Лабуристите, Енди Бернам, ќе ги објави плановите за ново дупчење на нафта и гас во Северното Море кога ќе стане премиер во понеделник, објави денес „Би-би-си“.

Бернам вчера официјално беше прогласен за лидер на владејачката Лабуристичка партија во Велика Британија, со што ја отстрани последната пречка за да ја преземе функцијата премиер следната недела. Тој ја презема функцијата од Кир Стармер, кој поднесе оставка по притисокот од партијата и јавноста поради низа неуспеси и погрешни пресметки.

Манифестот на Лабуристичката партија за 2024 година, кој новиот лидер рече дека ќе го следи, ветува дека нема да се издаваат нови лиценци за дупчење на нафта и гас, туку дека постојните ќе бидат почитувани, објави Би-Би-Си.

Во срцето на дебатата се две нафтени и гасни полиња во Шкотска – Роузбенк и Џекдо, кои беа одобрени од регулаторите во 2022 и 2023 година за време на тогашната конзервативна влада, но беа поништени во 2025 година откако беа оспорени на суд.

Објавата за одобрението за дупчење ќе биде дел од низа мерки што ќе ги презентира Бурнам, вклучувајќи планови за ставање на компаниите за вода и енергија под јавна контрола, како и нова програма за изградба на социјални станови.

Се очекува тој да открие и нови мерки за да им даде на луѓето одмор од трошоците за живот и рече дека има намера да направи динамичен почеток, со цел „што е можно поскоро да донесе опипливи промени во животот на луѓето“.

Иако деталите за новите планови за нафта и гас се нејасни, дебатата за Северното Море трае веќе долго време, а премиерот во заминување Кир Стармер беше критикуван за неговото противење на дупчењето. Тој рече дека новите лиценци нема да значат поевтина енергија за потрошувачите и дека транзицијата кон обновливи извори е поважна за да се обезбедат идните резерви на енергија.

Конзервативците и Партијата за реформи на Велика Британија вршат притисок врз Стармер да го одобри дополнителното дупчење, велејќи дека е „неодговорно“ земјата да не ги искористи сопствените ресурси во време кога војната во Иран ги зголеми цените на енергијата.

Пристапот на Стармер беше критикуван и од американскиот претседател Доналд Трамп, кој постојано повикуваше Северното Море да се отвори за нафта и на социјалните мрежи пред оставката на Стармер изјави дека „многу лошо ја завршил работата“ во енергетската политика.

Некои пратеници од Лабуристичката партија побараа од владата да усвои полиберален пристап, предупредувајќи дека транзицијата од нафта и гас мора да ги заштити работните места и трошоците за енергија. Но, други го поддржаа пристапот на владата, тврдејќи дека проширувањето на обновливите извори на енергија е клучно за подобрување на енергетската безбедност и намалување на влијанието на климатските промени.

Актуелниот министер за енергетика Ед Милибанд, кој веројатно ќе добие висока улога во владата под водство на Бернам, силно ја поддржа позицијата во манифестот на Лабуристите.

Порано оваа недела, пред рокот за номинации за лидерство на партијата, Бернам доби писмо од нафтената и гасната индустрија и синдикатите во кое се повикува него и другите пратеници од Лабуристичката партија да ја поддржат нафтата и гасот во Северното Море.

Во писмото се вели дека поддршката на нафтената и гасната индустрија е знак дека земјата останува посветена на производството и градежништвото, објави „Бета“.

Share on Facebook

Tweet

Follow us

Save