Италија воведе ново кривично дело „фемицид“ – Се казнува со доживотен затвор!

Италијанскиот Сенат едногласно усвои закон со кој се воведува ново кривично дело во Кривичниот законик: фемицид, казниво со доживотен затвор.

Новиот член 577-бис предвидува дека секој што ќе убие жена од омраза, дискриминација, контрола или затоа што е жена ќе биде казнет со доживотен затвор, објавува „Раи Уно“.

Во законот се наведува дека фемицидот се смета за извршен и кога мотивот е „одбивањето на жената да започне или продолжи емотивна врска и обидот да ги ограничи нејзините лични слободи“.

Законот предвидува укинување на рокот од 45 дена за прислушување во случаи на најтешки форми на насилство врз жените, што, како што е наведено во образложението на предложениот закон, ќе ја олесни работата на судските органи во истрагата и докажувањето на овие кривични дела. Законот мора да биде одобрен од Долниот дом на италијанскиот парламент, по што мора да биде потпишан од претседателот на Републиката.

Share on Facebook

Tweet

Follow us

Save