Новоизбраниот полски претседател: Русија е посткомунистичка држава предводена од воен злосторник

Новоизбраниот претседател на Полска, Карол Навроцки, изјави дека во моментов не го поддржува членството на Украина во Европската Унија, но истовремено повика на стратешка поддршка за Киев против Русија.

– Во моментов сум против влезот на Украина во ЕУ, рече Навроцки во интервју за унгарскиот весник Мандинер.

Тој додаде дека Русија е „постимперијална и посткомунистичка држава со Владимир Путин – воен злосторник – на чело“, додавајќи дека и самиот е прогонуван од руските власти како поранешен директор на Институтот за национално сеќавање, при што му се закануваат пет години затвор.

Навроцки повика на поддршка за Украина во борбата со Русија, но потенцира дека и таа треба да ги почитува интересите на другите земји, вклучително и на Полска и Унгарија.

– Полска, на пример, има интерес да ги ексхумира жртвите од Волинската трагедија – рече тој, додавајќи дека нема да се согласи на „нечесна конкуренција со Украина во земјоделството или логистиката“.

Навроцки истакна дека потребно е да се постигне компромис и консензус околу овие прашања.

Волинската трагедија беше низа настани што доведоа до етничко чистење на полското и украинското население во 1943 година за време на Втората светска војна. Таа беше дел од долгогодишно соперништво меѓу Украинците и Полјаците во денешна западна Украина. Полска ја смета Волинската трагедија за геноцид врз Полјаците.

Share on Facebook

Tweet

Follow us

Save