Паника во источна Германија: Полицијата деактивираше 21 експлозивна направа покрај електричната мрежа

Обвинителството во источната германска покраина Саксонија во понеделникот соопшти дека властите пронашле вкупно 21 експлозивна направа во рамките на истрагата за нападите врз електроенергетската мрежа, поради кои безбедносните служби се во состојба на зголемена готовност веќе неколку дена.

Во текот на викендот истражителите пронашле уште девет импровизирани експлозивни направи во близина на високонапонски далноводи јужно од трафостаницата „Грауштајн“, во источниот германски округ Герлиц. Со тоа вкупниот број пронајдени направи се искачи на 21, соопштија полицијата и обвинителството во заедничко соопштение.

Германија во последниот период е во центарот на европските стравувања за ранливоста на критичната инфраструктура. Минатата недела во земјата беа регистрирани серија инциденти и обиди за саботажа на електроенергетската мрежа, по августовскиот напад со дрон во областа на аеродромот Лајпциг/Хале, за кој германската влада официјално ја обвини Русија.

Германската полиција во петокот соопшти дека трага по маж кој преку писма презел одговорност за серијата саботажи врз електричната мрежа минатата недела. Во неговиот дом биле пронајдени предмети за кои се претпоставува дека се експлозиви. Осомничениот сè уште е во бегство.

Во меѓувреме, првичните наоди од истрагата за пожарот во трафостаница во Берлин во понеделникот покажале дека причината најверојатно била технички дефект, објави „Шпигел“, повикувајќи се на полициската комесарка Барбара Словик-Мајзел.

Одделно, весникот „Билд“ објави дека полицијата во западниот германски град Везел започнала голема истрага откако било утврдено дека заштитната ограда околу друга трафостаница била пресечена.

Share on Facebook

Tweet

Follow us

Save