Полска привремено ќе го суспендира правото на азил за граѓани од Русија и Белорусија

Полскиот премиер Доналд Туск денеска изјави дека планира привремено да го суспендира правото на азил како дел од новата мигрантска политика, укажувајќи на наводната злоупотреба од страна на источните соседи Белорусија и Русија.

Туск рече дека „државата мора да ја врати 100 отсто контролата при влезот и излезот од Полска“ и дека територијалната суспензија на правото на азил ќе биде дел од стратегијата што ќе биде претставена на состанокот на владата во вторник, објави полската новинска агенција ПАП.

Тој не соопшти детали, но на конвенцијата на неговата Граѓанска коалиција рече дека „ќе ја намали илегалната миграција во Полска на минимум“.

Полска се бори со миграциските притисоци на границата со Белорусија од 2021 година.

Последователните полски влади ги обвинија Белорусија и Русија дека таму привлекуваат мигранти од Блискиот Исток и Африка за да го дестабилизираат Западот.

Туск укажа на наводната злоупотреба на правото на азил „од (белорускиот претседател Александар) Лукашенко, од (рускиот претседател Владимир) Путин, од шверцери, шверцери на луѓе, шверцери со луѓе. Начинот на кој се користи ова право на азил е целосно спротивен на идејата за правото на азил“, рече тој.

Туск рече дека ќе бара признавање на одлуката за право на азил од Европската унија, пренесе ПАП.

Коментарите на Туск следуваат откако министерот за надворешни работи Радек Сикорски во четвртокот рече дека Полска ќе ги заостри визните регулативи, со што ќе се засили проверката на апликантите.

Share on Facebook

Tweet

Follow us

Save